Category:

Maha Guru

stories about mahaguru

Reading Room Maha Guru

ശിവഗിരിയിലെ നന്ദികേശൻ പറഞ്ഞ കഥ..

by Generalsecretary January 24, 2023

written by Generalsecretary

“ശിവഗിരി തീർത്ഥാടനത്തിന് /സന്ദർശനത്തിന് എത്തി മടങ്ങുന്ന എത്രപേർ എന്നെ ശ്രദ്ധിച്ചിട്ടുണ്ട് , എന്റെ കഥയറിഞ്ഞിട്ടുണ്ട്?

ഇനിയെങ്കിലും നന്ദിയോട് നന്ദികേടു കാണിക്കരുതേ , അത് ഗുരുനിന്ദയ്ക്കുതുല്യം. ശിവഗിരിതീർത്ഥാടനത്തിന് കിട്ടൻ റൈട്ടർ അനുമതി ചോദിച്ചപ്പോൾ , “കുഴൽവെള്ളത്തിൽ കുളിക്കാം , നമ്മുടെ ശാരദയെ തൊഴാം ” എന്ന് ഗുരു പറഞ്ഞത് അക്ഷരംപ്രതി പാലിച്ച് കുഴൽവെള്ളത്തിൽ കുളിച്ച് ശാരദാംബയെ തൊഴുത് ഭഗവാൻ ഏറെക്കാലം താമസിക്കുകയും ഒടുവിൽ മഹിസമാധി പ്രാപിക്കുകയും ചെയ്ത ഇടമായ വൈദികമഠത്തിലേക്കുളള പടികൾ കയറുമ്പോൾ ശ്രദ്ധിച്ചാൽ നിങ്ങൾക്കെന്നെ കാണാം.

ഒരല്പ്പം കഥ :-

പണ്ടിവിടെ ഒരു ശിവക്ഷേത്രമുണ്ടായിരുന്നു. ആ ക്ഷേത്രം കത്തിനശിച്ചിട്ടും വിദൂരമായ ശിവസാന്നിദ്ധ്യത്തിൽ കണ്ണുംനട്ട് നിതാന്ത ധ്യാനത്തിലാണ് ഞാനിപ്പോഴും. ശിവഗിരിക്കുന്നിൽ ഇപ്പോൾ കാണുന്ന ബോധാനന്ദസ്വാമിയുടെ സമാധിപീഠത്തിനുസമീപത്തായിരുന്നു ഓലമേഞ്ഞ ശിവക്ഷേത്രം നിന്നിരുന്നത്.

ഗുരുശിഷ്യനായ ശങ്കരൻപരദേശി സ്ഥാപിച്ച് പ്രതിഷ്ഠ നടത്തിയതായിരുന്നു അത്. ഗുരുദേവൻ ശാരദാപ്രതിഷ്ഠ നടത്തുന്ന സമയത്താണ് ശിഷ്യൻ ശിവപ്രതിഷ്ഠ നടത്തിയത്.ഭഗവാന്റെ ഗൃഹസ്ഥശിഷ്യൻ ഗോവിന്ദച്ചാന്നാർ,അകാലത്തിൽ പൊലിഞ്ഞ അദ്ദേഹത്തിന്റെ മകൾ വനജാക്ഷിക്കായി വാങ്ങിവെച്ച സ്വർണ്ണം ശിവഗിരിക്ക് സമർപ്പിച്ചത് ശങ്കരൻപരദേശിയെടുത്ത് ശിവന് അംഗോപാംഗങ്ങൾ തീർത്ത് ശിവലിംഗത്തിൽ ചാർത്തി. അത് ഗുരുദേവന് രസിച്ചില്ല. സ്വർണ്ണം അതിനായി ഉപയോഗിക്കേണ്ടതില്ലായിരുന്നു എന്ന് തൃപ്പാദങ്ങൾ വിയോജിപ്പ് പ്രകടിപ്പിച്ചു. ശിലയെ ശിവനായി സങ്കല്പിച്ചപ്പോൾതന്നെ അതിന്റെ മൂല്യം അളക്കാനാവാത്തവിധം ഉയരും, പിന്നെയെന്തിന് സ്വർണ്ണം ചാർത്തണം? അതായിരുന്നു ഭഗവാന്റെ അഭിപ്രായം. കുറച്ചു നാളുകൾക്കു ശേഷമാണ് ക്ഷേത്രം തീപിടിച്ചു നശിച്ചത്.

ആ സമയം ഭഗവാൻ അഞ്ചുതെങ്ങ് ജ്ഞാനേശ്വരക്ഷേത്രത്തിലായിരുന്നു. ക്ഷേത്രത്തിന് തീപിടിച്ചു നശിച്ചവിവരം അറിഞ്ഞപ്പോൾ “ശിവനങ്ങും നാമിങ്ങും” എന്നാണ് ഭഗവാൻ മൊഴിഞ്ഞത്. ക്ഷേത്രം പിന്നീട് പുനർനിർമ്മിച്ചില്ല.ശിഷ്യരുടെ പ്രവർത്തികൾക്ക് ഭഗവാൻ വിഘ്നമുണ്ടാക്കില്ലായിരുന്നു. എല്ലാ കർമ്മങ്ങൾക്കും സ്വാഭാവികമായ പരിണതിയുണ്ട്,അതനുഭവിച്ചറിയട്ടെ എന്നായിരുന്നു അവിടുത്തെ നിലപാട്.

ഗുരുത്വപൂർണത പുരുഷാകൃതിപൂണ്ട് ഭൂമിയിൽവിളങ്ങുമ്പോൾ പിന്നെ വേറൊരു ശിവൻ അവിടെയെന്തിന് ? ക്ഷേത്രാവശിഷ്ടങ്ങൾ പെറുക്കിമാറ്റിയിട്ടും തൃപ്പാദങ്ങൾ എന്നെ മാറ്റിയില്ല. എന്നെ കണ്ടുകൊണ്ടുവേണം ഓരോ തീർത്ഥാടകനും ശിവഗിരിക്കുന്ന് കയറാനെന്ന് തൃപ്പാദങ്ങൾ നിശ്ചയിച്ചിട്ടുണ്ടാകണം.

ഭഗവാൻ ശിവന്റെ വാഹനമായ എന്നെ വണങ്ങുമ്പോൾ ശ്രീപരമേശ്വരന്റെ കാരുണ്യത്തെ നന്ദിപൂർവ്വം സ്മരിക്കുകയാണ് മോക്ഷാർത്ഥിയായ ശിവഗിരിതീർത്ഥാടകർ ചെയ്യുന്നത് “

°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°

January 24, 2023 0 comments

Maha Guru Reading Room

ഗുരുദേവൻ_നല്കിയ_അറിവിന്റെ_കുഴച്ചക്കകൾ_കഴിയ്ക്കാം…

by Generalsecretary February 14, 2022

written by Generalsecretary

ഒരിക്കല്‍ സ്വാമികള്‍ അദ്വൈതാശ്രമത്തില്‍ വിശ്രമിക്കുന്ന സമയത്ത് ഒരു പരിചാരകന്‍ കുറച്ച് ചക്കച്ചുള കൊണ്ടുവന്നു സമര്‍പ്പിച്ചു…ഗുരുദേവന്‍: എന്താണത്…?പരിചാരകന്‍: കുറച്ച് ചക്കച്ചുളയാണ് സ്വാമീ…ഗുരുദേവന്‍: കുഴയോ വരിക്കയോ..?പരിചാരകന്‍: വരിക്ക, നല്ല ചക്കയാണ്…ഗുരുദേവന്‍: വരിക്ക നമുക്ക് വേണ്ട, കുഴയില്ലേ…?പരിചാരകന്‍: ഉണ്ട്:ഗുരുദേവന്‍: അതാണെങ്കില്‍ കഴിക്കാം…പരിചാരകന്‍ കുഴച്ചക്ക കൊണ്ടുവന്നു. അത് ഭക്ഷിക്കുന്നതിനിടയില്‍ ഗുരുദേവന്‍ പറഞ്ഞു…”കുഴച്ചക്ക തിന്നാന്‍ ക്ഷമ വേണം, വിഴുങ്ങിയാല്‍ ദഹിക്കാന്‍ പ്രയാസം, അതിന്റെ രസം മാത്രമേ ഇറക്കാവൂ”.ആലുവാ അദ്വൈതാശ്രമത്തിലെ പ്ലാവുകളില്‍ കുഴച്ചക്ക ധാരാളം ഉണ്ടാകുമായിരുന്നു, പക്ഷെ ആരും കഴിക്കാതെ കൂടുതലും പാഴായി പോകുകയാണ് പതിവ്. ആര്‍ക്കും ഉപകാരം ഇല്ലാതെ അങ്ങിനെ പാഴാക്കി കളയുന്നതിന് ഒരു മറുമരുന്ന് എന്ന രീതിയില്‍ ആയിരിക്കണം ഗുരുദേവന്‍ ഇങ്ങനെ പറഞ്ഞത് എന്ന് അനുമാനിക്കാം. ഭക്ഷ്യ വസ്തുക്കള്‍ ഒരിക്കലും നാം പാഴാക്കരുത്, നമുക്ക് ഇഷ്ടമില്ല എങ്കില്‍ എന്തുകൊണ്ട് അത് ഇഷ്ടമുള്ളവര്‍ക്ക് കൊടുത്തുകൂടാ…? പ്രകൃതി നമുക്ക് നല്‍കുന്ന വിഭവങ്ങള്‍ അനുഭവിക്കുക എന്നത് മാത്രമല്ല, അത് പാഴാക്കി കളയാതെ മറ്റുള്ളവര്‍ക്ക് കൂടി എത്തിച്ച് കൊടുക്കുവാനും നാം കടപ്പെട്ടിരിക്കുന്നു. ഇന്ന് നാം പാഴാക്കുന്ന ഓരോ ഭക്ഷ്യ വസ്തുക്കള്‍ക്കും പകരമായി അതിന്റെ വില നാം മനസ്സിലാക്കുന്ന ഒരു കാലം നമ്മുടെ ജീവിതത്തില്‍ തന്നെ വന്നുകൂടാ എന്നില്ലല്ലോ…!ഗുരുദേവന്റെ ഈ സംഭാഷണത്തില്‍ നിന്നും നാം മനസ്സിലാക്കേണ്ട മറ്റൊന്നുകൂടി ഉണ്ട്. ഭഗവാന്റെ ഓരോ ഉപദേശങ്ങളും കൃതികളും സത്യത്തില്‍ ഈ കുഴച്ചക്ക പോലെയാണ്., വെറുതെ അങ്ങ് വായിച്ച് പോയാല്‍ ദഹിക്കാന്‍ പ്രയാസം. സാവധാനം മനസ്സും ശ്രദ്ധയും എകാഗ്രമാക്കി അവയെ ഉള്‍ക്കൊള്ളാന്‍ ശ്രമിക്കുമ്പോള്‍ മാത്രമാണ് നമുക്ക് അവയുടെ രസം അനുഭവിക്കാന്‍ കഴിയുന്നത്. ആത്മോപദേശ ശതകത്തിലെയോ ദൈവ ദശകത്തിലെയോ ഒരു ശ്ലോകം വെറുതെ വായിച്ചാല്‍ “യുക്തിവാദി” എന്ന് സ്വയം ധരിച്ച് നടക്കുന്ന “യുക്തിഹീനര്‍ക്ക്” അത് നിസ്സാരമായി തോന്നും. ദൈവദശകം ഒരു ഭജനപ്പാട്ട് ആണെന്ന് പറഞ്ഞുകൊണ്ട് ഇപ്രകാരം ഒരു യുക്തിജീവി എഴുതിയ കുറച്ച് വരികള്‍ ഈയിടെ കാണുകയുണ്ടായി. ഒരു സമൂഹജീവി എന്ന നിലയില്‍ എന്തെങ്കിലും മറ്റുള്ളവര്‍ക്ക് വേണ്ടി ചെയ്തതിനു ശേഷമാണോ ഇവരെല്ലാം ഗുരുദേവ കൃതികളെ വിമര്‍ശിക്കാന്‍ നടക്കുന്നത്…? സ്വജീവിതം നിരാലംബരായ മനുഷ്യരുടെ ഭൌതികവും ആദ്ധ്യാത്മികവുമായ ഉന്നതിക്കുവേണ്ടി ബലി ചെയ്ത ഒരു ഗുരുവിനെ അറിയുവാനും പഠിക്കുവാനും എല്ലാവര്ക്കും കഴിഞ്ഞു എന്ന് വരില്ല…! വരിക്കച്ചക്ക മാത്രം തൊണ്ട തൊടാതെ വിഴുങ്ങുന്ന അവര്‍ക്ക് കുഴച്ചക്കയുടെ ഔഷധമൂല്യം ഒരു കാലത്തും അറിയുവാനും പോകുന്നില്ല.കുഴച്ചക്ക നല്ല ഔഷധമൂല്യമുള്ള ഒന്നാണ്, പക്ഷെ മിക്കവാറും ആളുകള്‍ അത് ഒഴിവാക്കും. കഴിക്കാന്‍ എളുപ്പമുള്ളതും നാവിനു രസമുള്ളതും മാത്രം ഭക്ഷിച്ച് മാറാരോഗങ്ങളെ ക്ഷണിച്ച് വരുത്തും…!നമുക്ക് ഗുരുദേവന്‍ നല്‍കിയ അറിവിന്റെ കുഴച്ചക്കകള്‍ കഴിയ്ക്കാം…! ഒന്നും തൊണ്ട തൊടാതെ വിഴുങ്ങാതെ; സാവധാനം അതിന്റെ രസം ആസ്വദിച്ച് തന്നെ കഴിക്കാം…!

February 14, 2022 1 comment

Maha Guru Reading Room

ഗുരുദേവന്റെ മഹത് വചനങ്ങൾ

by Generalsecretary October 5, 2021

written by Generalsecretary

ഒരു ജാതി ഒരു മതം ഒരു ദൈവം മനുഷ്യന്’ എന്ന് പറഞ്ഞുപഠിപ്പിച്ച ഗുരു. സവര്‍ണ മേല്‍ക്കോയ്മയ്ക്കും, ജാതിവിവേചനത്തിനും തൊട്ടുകൂടായ്മയ്ക്കുമെതിരെ പിറന്ന ശബ്ദം. വിദ്യാലയമാണ് മനുഷ്യനെ ഉത്തമനാക്കാന്‍ വേണ്ടതെന്ന് തിരിച്ചറിഞ്ഞ ശ്രീനാരായണ ഗുരുവിന്‍റെ മഹത് വചനങ്ങൾ

മതമേതായാലും മനുഷ്യൻ നന്നായാൽ മതി

“വാദിക്കാനും ജയിക്കുവാനും അല്ല, അറിയാനും അറിയിക്കുവാനും ആണ് വിദ്യ”

“വിവേകം താനേ വരില്ല, യത്നിക്കണം ധാരാളം വായിക്കണം”

”ഈ ലോകം സത്യത്തിലാണ് സ്ഥിതിചെയ്യുന്നത് അതുകൊണ്ട് കള്ളം പറയരുത്, സത്യം മാത്രം പറയുക”

“നിസ്വാർത്ഥകമായ സേവനത്തിനു എപ്പോഴും ഈശ്വരാനുഗ്രഹം ഉണ്ടാകും”

“മടിയന്മാരായി ജീവിക്കുന്നത് നീതിക്ക് നിരക്കാത്തത്”

“ശുചിത്വം അടുക്കളയില്‍ നിന്ന് തുടങ്ങുക”

“വ്യവസായം കൊണ്ടല്ലാതെ ധനാഭിവൃദ്ധി ഉണ്ടാക്കുവാന്‍ സാധിക്കുന്നതല്ല”.

”ഭക്തിയില്ലാത്ത ജീവിതത്തിനു ഉപ്പില്ലാത്ത ചോറ് കൊടുക്കണം”

”ശീലിച്ചാല്‍ ഒന്നും പ്രയാസം ഇല്ലാ, തീയിലും നടക്കാം”

“കൃഷിചെയ്യണം, കൃഷിയാണ് ജീവരാശിയുടെ നട്ടെല്ല്”

“നാം ദൈവത്തിന്റെ പ്രതിപുരുഷന്‍ മാത്രം, ശരീരം വെറും ജഡം”

“അനാവശ്യമായ ധനവ്യയം ഒരു മംഗളകർമ്മത്തിനും പാടില്ലാ”

“എല്ലാവരും ഈശ്വരനെ ആണ് ആരാധിക്കുന്നത് ബിംബത്തെ അല്ല”

ഹിംസയേക്കാൾ വലിയ പാപമില്ല. ഈശ്വരന്റെ പേരിൽ ഹിംസ നടത്തുന്നത് പരിഹാരമില്ലാത്ത മഹാപാപമാണ്. പ്രാണികളെ ബലികൊടുക്കുന്ന ക്ഷേത്രങ്ങളിൽ പോകുകയോ തൊഴുകയോ ചെയ്യരുത്.

ധനസമ്പാദനത്തിനുള്ള മാർഗ്ഗം ഇതു മാത്രമാണ്. സാധുക്കൾക്ക് തൊഴിലുകൾ ഉണ്ടാക്കികൊടുക്കണം. ഭിക്ഷയോ ദാനമോ കൊടുക്കുന്നതിനേക്കാൾ ഉത്തമമാണ് തൊഴിൽ നല്കുന്നത്.

മേൽജാതി എന്നും കീഴ്‍ജാതി എന്നും ഉള്ള വേർതിരിവ് സ്വാർത്ഥൻമാരുണ്ടാക്കിയ കെട്ടുകഥമാത്രമാണ്. അതിനെ സമ്മതിച്ചുകൊടുക്കേണ്ട കാര്യമില്ല. മേൽജാതി ഉണ്ടെന്ന വിശ്വാസം ആത്മാവിന്റെ സ്വച്ഛന്ദതയെ തടഞ്ഞ് അഭിവൃദ്ധിയെ നശിപ്പിച്ച് ജീവിതം കൃപണവും നിഷ്പ്രയോജനവും ആക്കി തീർക്കുന്നു. അതുപോലെ കീഴ്‍ജാതി ഉണ്ടെന്ന വിശ്വാസം മനസ്സിൽ അഹങ്കാരവും ദുരഭിമാനവും വർദ്ധിപ്പിച്ച് ജീവിതത്തെ പൈശാചികമാക്കി നശിപ്പിക്കുന്നു.‌

മദ്യം വിഷമാണ്; അതുണ്ടാക്കരുത്, കൊടുക്കരുത്, കുടിക്കരുത്

വിവേകം താനേ വരില്ല, യത്നിക്കണം ധാരാളം വായിക്കണം

മതസംബന്ധമായ മൂഢവിശ്വാസം പാടില്ല. ഒരു മതത്തേയും ദ്വേഷിക്കരുത്.

അവനവനാത്മ സുഖതിന്നാചരിക്കുന്നവ അപരന് സുഖത്തിനായ് വരേണം

വിദ്യ കൊണ്ട് പ്രബുദ്ധരാവുക, സംഘടന കൊണ്ട് ശക്തരാവുക, പ്രയത്നം കൊണ്ട് സമ്പന്നരാവുക

ജാതിഭേദം മതദ്വേഷം ഏതുമില്ലാതെ സര്‍വ്വരും സോദരത്വേന വാഴുന്ന മാതൃകാസ്ഥാനമാണിത്.

ഇനി ക്ഷേത്ര നിര്‍മ്മാണത്തെ പ്രോത്സാഹിപ്പിക്കരുത്. ക്ഷേത്രത്തില്‍ ജനങ്ങള്‍ക്കുള്ള വിശ്വാസം കുറഞ്ഞു വരികയാണ്. അമ്പലം കെട്ടുവാന്‍ പണം ചിലവിട്ടതിനു ദുര്‍വ്യയമായി എന്നും പശ്ചാത്തപിക്കുവാന്‍ ഇടയുണ്ട്. കാലത്തിന് അത്രമാത്രം മാറ്റം വന്നിരിക്കുന്നു. എങ്കിലും തല്‍ക്കാലം ക്ഷേത്രം വേണ്ടെന്നു പറഞ്ഞാല്‍ ജനങ്ങള്‍ കേള്‍ക്കുകയില്ല. നിര്‍ബന്ധമാണെങ്കില്‍ ചെറിയ ക്ഷേത്രം വച്ചുകൊള്ളട്ടെ. പ്രധാന ദേവാലയം വിദ്യാലയമായിരിക്കണം. പണം പിരിച്ചു പള്ളിക്കൂടങ്ങള്‍ കെട്ടുവാനാണ് ഉത്സാഹിക്കേണ്ടത്.

അഴിമതി ഇല്ലെന്നും നീതി മാത്രമേ നടക്കൂ എന്നും ജനങ്ങള്‍ക്ക് വിശ്വാസം വരണം. അപ്പോള്‍ എല്ലാവരും ഭരണത്തെ അനുകൂലിക്കും.

മറ്റുള്ളവരെ നിരൂപണം ചെയ്യാന്‍ പഠിച്ചാല്‍ പോരാ നിങ്ങളില്‍ ഓരോരുത്തരും ഒരാത്മ പരിശോധന നടത്തുന്നത് നന്നായിരിക്കും.

പ്രാഥമിക വിദ്യഭ്യാസമെങ്കിലും എല്ലാവര്‍ക്കും ഉണ്ടായിരിക്കണം. വിദ്യയാണ് ഇരുകാലി മാടുകളെ യഥാര്‍ത്ഥ മനുഷ്യരാക്കിത്തീര്‍ക്കുന്നത്.

October 5, 2021 3 comments

Maha Guru Reading Room

ശ്രീനാരായണഗുരു കഥകൾ

by Generalsecretary October 1, 2021

written by Generalsecretary

ഒരു ദിവസം സ്വർണനാണയങ്ങളുമായി ശ്രീ നാരായണ ഗുരുവിനെ കാണാന്‍ വന്ന ഭക്തനോട് “എന്തിനാണ് പൊന്ന്? നമുക്കാവശ്യമില്ല” എന്നായിരുന്നു ഗുരു മൊഴിഞ്ഞത്. എന്നാൽ അയാൾ ആ നാണയങ്ങൾ നേർച്ചപ്പെട്ടിയിൽ ഇട്ട് മടങ്ങുകയായിരുന്നു.

എല്ലാവരും കാൺകെ ആ ഭക്തൻ കാണിക്കപ്പെട്ടിയിൽ അർപ്പിച്ച സ്വർണനാണയങ്ങൾ പിറ്റേന്ന് കാണുന്നില്ല. ആരാണ് അതെടുത്തതെന്നറിയാൻ ശിഷ്യർ എല്ലാവരും ചേര്‍ന്ന് അന്തേവാസികളെ മുഴുവൻ ശ്രീ നാരായണ ഗുരുവിന്‍റെ മുന്നിൽ എത്തിച്ചിരിക്കുകയാണ്.

ആ കാരണംകൊണ്ട് ഇതാ ആശ്രമാന്തരീക്ഷം കലുഷമാക്കിയിരിക്കുന്നു. ഇനി മോഷ്ടിച്ചയാളെ കണ്ടെത്തണം. തെറ്റിൽനിന്ന് മോചിപ്പിക്കണം.

ഗുരു എല്ലാമുഖങ്ങളിലേക്കും നോക്കി ചോദിച്ചു: “പറയൂ, നിങ്ങളിൽ ആരാണ് തെറ്റിന്‍റെ പ്രലോഭനത്തിൽപ്പെട്ടു പോയത്?”

ആരും ഒന്നും മിണ്ടിയില്ല.

ഏറ്റുപറഞ്ഞ് മാപ്പപേക്ഷിച്ചാൽ പൊറുക്കാൻ തയ്യാറായ ഒരു ഹൃദയവുമായാണ് ഗുരു മോഷ്ടാവിനോട് സ്വയം വെളിപ്പെടാൻ ആവശ്യപ്പെട്ടത്. അതുണ്ടായില്ല. സംസാരസമുദ്രത്തെ താണ്ടി സത്യത്തിന്‍റെ മറുകരയിലെത്താൻ ഒപ്പം പുറപ്പെട്ടവരിൽ ആരോ ഒരാൾ മോഹാന്ധകാരത്തിലേക്ക് വീണിരിക്കുന്നു..

മൗനം വാക്കുകൊണ്ടുടച്ച് ഗുരു മൊഴിഞ്ഞു: “എങ്കിൽ പൊലീസിനെ വിളിക്കാം.”

ശിഷ്യർപോലും അതുകേട്ട് ഞെട്ടി.

പണ്ട് അരുവിപ്പുറത്ത് ഒരു വാഴക്കുല മോഷ്ടിച്ച കള്ളനെ അന്തേവാസികളുടെ പരാതിയെത്തുടർന്ന് കെട്ടിയിട്ട് അടിക്കാൻ കോടതി ഉത്തരവിടാൻ പോകുന്നു എന്നറിഞ്ഞ്,

“നാം ഇനി അങ്ങോട്ടില്ല. ആ സാധുവിന്റെ ആർത്തനാദത്താൽ മലീമസമായ വായു സന്യാസിക്ക് എങ്ങനെ ശ്വസിക്കാൻ സാധിക്കും”

എന്ന് പറഞ്ഞ ഗുരുദേവൻ ഇപ്പോൾ ആദ്യമായി കളവിന്‍റെ പേരിൽ പൊലീസിനെ വിളിക്കാൻ ഒരുങ്ങുന്നു.

‘ഒരു നേരത്തെ അന്നത്തിനുവേണ്ടി പൊതുസ്ഥലമായ ആശ്രമത്തിൽനിന്ന് ഭക്ഷ്യവസ്തു എടുത്തവൻ എങ്ങനെ കള്ളനാകും. ഇവിടെ അതല്ലല്ലോ സംഭവിച്ചിരിക്കുന്നത്. കഴിക്കാൻ ഭക്ഷണവും ഉടുക്കാൻ വസ്ത്രവും ഏത് അന്തേവാസിക്കും ലഭ്യമാണ്. എന്നിട്ടും ഒരാൾ പാപം ചെയ്തിരിക്കുന്നു. അതാണ് ഗുരു കടുത്ത തീരുമാനത്തിൽ എത്തിച്ചിരിക്കുന്നത്.’ അവിടെ കൂടിനിന്നവര്‍ പരസ്പരം ഇങ്ങനെ ഓരോന്ന് പറഞ്ഞ് ഗുരുവിന്റെ മനസ് വ്യാഖ്യാനിക്കാൻ ശ്രമിച്ചു…

ഗുരു അത് ശ്രദ്ധിക്കാതെ ആൾക്കൂട്ടത്തിൽ നിന്ന് ഒരാളെ ഗുരു അടുത്തേക്ക് വിളിച്ചു. എന്നിട്ട് പറഞ്ഞു:

“നീ പോയി പൊലീസിനെ വിളിച്ചുകൊണ്ടുവരിക.”

അയാൾ ആജ്ഞ ശിരസാവഹിച്ച് ന‌ടന്നകലുന്നത് കണ്ട് ഗുരു നിർന്നിമേഷനായി നോക്കിയിരുന്നു.

സന്ധ്യയായി. പൊലീസിനെ വിളിക്കാൻ പോയ അന്തേവാസി വന്നില്ല. ശിഷ്യർ പരിഭ്രമത്തോടെ ഗുരുസവിധത്തിലെത്തി. ഗുരുവിന് അവരുടെ വരവിന്‍റെ ഉദ്ദേശം മനസിലായി…

“അയാൾക്ക് ഇനി വരാനാവില്ല.” എന്നുമാത്രമേ ഗുരുദേവൻ മൊഴിഞ്ഞുള്ളൂ .

സ്വർണനാണയം മോഷ്ടിച്ചയാളെ ഗുരുവിന് തിരിച്ചറിയാൻ സാധിച്ചിരുന്നു. അതുകൊണ്ടാണ് പൊലീസിനെ വിളിക്കാൻ അയാളെത്തന്നെ നിയോഗിച്ചതും. ഇനി ഈ തപോഭൂവിൽ കാലുകുത്താൻ അയാൾക്ക് സാധിക്കില്ലെന്നും ഗുരുദേവനറിയാമായിരുന്നു.

മോഹാന്ധകാരത്തിൽ അകപ്പെടാത്തവർ ഭൂലോകവാസികളിൽ വിരളമാണ്. തെറ്റുപറ്റിയാൽ അതേറ്റുപറഞ്ഞ് ശിക്ഷയേറ്റുവാങ്ങാനും പിന്നെ ആവർത്തിക്കാതിരിക്കാനും കഴിയണം. അതിനുള്ള വിവേകം ഉണരാത്തവരെ രക്ഷിക്കാൻ ദൈവത്തിനുപോലും സാധ്യമല്ല. അങ്ങനെയുള്ളവർ പവിത്രമായ ഇടങ്ങളിൽ വസിച്ചാൽ അവിടം നിരന്തരം മലിനപ്പെട്ടുകൊണ്ടേയിരിക്കും…

എങ്ങിനെയാണ് ഗുരു കള്ളനെ തിരിച്ചറിഞ്ഞത് ?…..

ധ്യാനിച്ച്‌ സ്വയം ഉള്ളിലേക്ക് പോയി അറിയാന്‍ ശ്രമിക്കൂ…..

ഉത്തരം കിട്ടുന്നില്ലെങ്കില്‍ ആ മഹാഗുരുവിന്‍റെ പിന്നാലെ നമുക്ക് ഒന്നിച്ച് പോകാം…..

October 1, 2021 0 comments

Maha Guru Reading Room

അദ്വൈതാശ്രമത്തിലെ മാമ്പഴം

by Generalsecretary September 29, 2021

written by Generalsecretary

ഒരുദിവസം ആലുവ അദ്വൈതാശ്രമത്തിൽ ഗുരുദേവൻ വന്നിരിക്കുന്നതായ വാർത്ത ചെറായിലാകെ പരന്നു. അതറിഞ്ഞ് ചില വിദ്യാർത്ഥികൾ രാത്രി തന്നെ ഗുരുദേവനെ ദർശിക്കുന്നതിനായി അദ്വൈതാശ്രമത്തിലേക്ക് പുറപ്പെട്ടു. കാൽനടയായിട്ടായിരുന്നു യാത്ര . അവർ പറവൂരിൽ എത്തിയപ്പോൾ നേരം പുലർന്നു. അവിടെ നിന്നും ആലുവയിലേക്ക് ഏതാണ്ട് 12 നാഴിക ദൂരം ഉണ്ട് .അന്ന് ചെറിയ ചാറ്റൽ മഴയുള്ള ദിവസം ആയിരുന്നു. ആ മഴ എല്ലാം നനഞ്ഞു കൊണ്ട് തന്നെ കുട്ടികൾ ആലുവാപ്പുഴയുടെ തീരത്തുള്ള അദ്വൈതാശ്രമത്തിൽ എത്തിച്ചേർന്നു.

ഗുരുദേവൻ ആശ്രമ മുറ്റത്ത് പടർന്നു പന്തലിച്ചു നിന്നിരുന്ന ഒരു വലിയ മാവിന്റെ തണലിൽ ഇരിക്കുകയായിരുന്നു. കുട്ടികളെ കണ്ടപ്പോൾ ഗുരുദേവൻ വാത്സല്യപൂർവ്വം ചോദിച്ചു. “വിദ്യാർത്ഥികളാണല്ലേ ?”

കുട്ടികൾ :- ” അതെ “

ഗുരുദേവൻ :- “എന്താണ് എല്ലാവരും ഒരുമിച്ച് വന്നത്?”

കുട്ടികൾ :- “തൃപ്പാദങ്ങളെ കാണാൻ വന്നതാണ് “

ഗുരുദേവൻ :- “മലവെള്ളം കാണാതെ പോകരുത് “

കുട്ടികൾ തമ്മിൽ തമ്മിൽ നോക്കി മഴക്കാലമായതിനാൽ ആലുവാപ്പുഴയിൽ മലവെള്ളം നിറഞ്ഞൊഴുകുന്നത് കാണുവാൻ കൂടിയായിരുന്നു അവർ എത്തിയിരുന്നത്. അത് ഗുരുദേവൻ എങ്ങനെ അറിഞ്ഞു എന്നറിയാതെ കുട്ടികൾ ആശ്ചര്യപ്പെട്ടു.

അന്ന് ആശ്രമ മുറ്റത്തെ ഒരു പനമ്പ് വിരിച്ച് അതിൽ കുറെ മാങ്ങകൾ കൂട്ടിയിട്ടു

ഉണ്ടായിരുന്നു . ഒരു സന്യാസിവന്നു അതു തരംതിരിക്കാൻ തുടങ്ങി .അത് കണ്ടിട്ട് ആ സന്യാസിയോടായി ഗുരുദേവൻ അരുളിച്ചെയ്തു. “ഇവർക്ക് മാമ്പഴം എടുത്തു കൊടുക്കണം. “

അതു കേട്ടിട്ട് സന്യാസി ഉടനെ അകത്തേക്ക് പോയി .കുറെ നേരം കഴിഞ്ഞിട്ടും അദ്ദേഹം ഇറങ്ങി വരികയുണ്ടായില്ല കുറെ കൂടി കഴിഞ്ഞപ്പോൾ ഗുരു ദേവൻ എഴുന്നേറ്റ് ആ മുറിക്കകത്തേക്ക് കയറി . അത് ആ സന്യാസി കാണുകയുണ്ടായില്ല. അദ്ദേഹം മുറിക്കുള്ളിൽ വെച്ചിരുന്ന മാമ്പഴങ്ങളിൽ ചീത്ത ആയതും ചീത്തയാകാത്തതും തിരിയുകയായിരുന്നു. അപ്പോൾ അത് കണ്ടിട്ട് ഗുരുദേവൻ പറഞ്ഞു :- “ചീത്തയായത് ഇല്ലെങ്കിൽ നല്ലതുതന്നെ കൊടുത്തേക്കൂ. “

ഗുരുദേവൻ കയറിച്ചെന്നത് അപ്പോഴാണ് ആ സന്യാസി അറിഞ്ഞത്. അവിടെ തരംതിരിച്ചു വച്ചിരുന്നതിൽ നിന്നും നല്ല മാമ്പഴം നോക്കി എടുത്ത് ഗുരുദേവൻ കുട്ടികൾ കൊടുത്തു.

September 29, 2021 0 comments

Maha Guru Reading Room

ഈ കെട്ടിടത്തിനു മൂക്കില്ലല്ലോ..!

by Generalsecretary September 29, 2021

written by Generalsecretary

ശിവഗിരിയിലെ ഇംഗ്ലീഷ് സ്കൂൾ ഗുരുദേവന്റെ വലിയൊരു സ്വപ്നമായിരുന്നു .ആ സ്കൂളിനുവേണ്ടി കെട്ടിടം പണിയുന്ന തിനുള്ള പണം പിരിക്കുന്നതിന് ഗുരുദേവൻ ധാരാളം യാത്രകൾ ചെയ്തിരുന്നു. സ്ക്കൂളിന്റെ ഓരോ പണിയിലും വരുന്ന കുറവുകൾ അപ്പപ്പോൾ ചൂണ്ടിക്കാണിക്കുന്നതിൽ വലിയ ശ്രദ്ധ ഗുരുദേവൻ പുലർത്തിയിരുന്നു. അതിനാൽ നിർമ്മാണവേളയിൽ ഏർപ്പെട്ടിരുന്ന എല്ലാവരും ഏറെ ശ്രദ്ധയോടെയാണ് പണികൾ ചെയ്തിരുന്നത്.

അതിനിടയിൽ ഗുരുദേവൻ കുറെ നാളുകൾ വടക്കൻ ജില്ലകളിൽ യാത്രയിലായിരുന്നു. ആ അവസരത്തിലാണ് സ്കൂളിന്റെ

പൂമുഖത്തിന്റെ പണി നടന്നിരുന്നത്. ആ സമയത്തെ പ്ലാനിൽ കാണിച്ചിരുന്ന വിധം പൂമുഖം നിർമിക്കുന്നതിന് വേണ്ട പണം ശിവഗിരിയിൽ ഉണ്ടായിരുന്നില്ല. അതിനാൽ അപ്പോഴുള്ള പണത്തിൻറെ കണക്ക് അനുസരിച്ച് തട്ടു പോലൊരു പൂമുഖം ബോധാനന്ദ സ്വാമികളുടെ മേൽനോട്ടത്തിൽ പണിയുകയാണ് ചെയ്തിരുന്നത്.

അതിന്റെ ഒരാഴ്ച കഴിഞ്ഞപ്പോൾ ഗുരുദേവൻ ശിവഗിരിയിൽ മടങ്ങിയെത്തി. അന്നുതന്നെ സ്കൂളിൻറെ പണി കാണുവാനായി പോയി. തട്ടുപോലെ പണിതിരിക്കുന്ന സ്കൂളിന്റെ പൂമുഖം കണ്ടിട്ട് ഗുരുദേവന് ഒട്ടും ഇഷ്ടമായില്ല. പ്ലാനിൽ നിന്നും മാറി അങ്ങനെ പണിതതെ എന്തുകൊണ്ടാണെന്ന് പണി ചെയ്യ്തിരുന്ന ചുമതലക്കാരനോടെ അന്വേഷിച്ചു. പണത്തിന്റെ കുറവ് കൊണ്ടാണെ അങ്ങനെ മാറ്റി പണിയുവാൻ ബോധാനന്ദസ്വാമി പറയുകയുണ്ടായതെന്ന് അയാൾ മറുപടിയും പറഞ്ഞു .ആ മറുപടിയും ഗുരുദേവന് തീരെ ഇഷ്ടമായില്ല. അപ്പോഴുണ്ടായ അതൃപ്തി മറച്ചു വെയ്ക്കാതെ ഗുരുദേവൻ ഇങ്ങനെ പറഞ്ഞു ” ഈ കെട്ടിടത്തിനു മൂക്കില്ലല്ലോ. “

മൂക്ക്ഇല്ലാത്തൊരു മനുഷ്യനെ സങ്കൽപ്പിച്ചു നോക്കിയാൽ എത്ര വികൃതമായ രൂപം ആയിരിക്കുമോ അത്രയും വികൃതമാണ് ഈ കെട്ടിടത്തിന്റെ അപ്പോഴത്തെ രൂപം എന്ന് ചിന്തിപ്പിക്കുന്നതിനായിരുന്നു ഗുരുദേവൻ അത്രയും പറഞ്ഞത്. പിന്നീട് പ്ലാനിൽ ഉണ്ടായിരുന്ന വിധമുള്ള പൂമുഖം നിർമ്മിക്കുകയുണ്ടായി

September 29, 2021 0 comments